Мәтінді оқы. Әке мен бала қай жерде отыр?
Ол қазір ауыл сыртындағы төбеде отыр. Қасында жақында ғана Арал маңындағы қазақ пен қарақалпақтың ханы болып сайланған, үлкен баласы Нұралы. Бозаңды төбенің басына төселген текеметтің үстінде ақ жастыққа шынтақтай жатып, әкелі-балалының әңгімелескеніне бие сауымнан артық уақыт болды... Әкесі мен баласы талайға дейін үнсіз отырып қалды. Бұл екеуінің бүгінгі сырласуы Ор қаласында болатын кеңеске дайындалудан туған. Орынбор губернаторы Неплюев қазақ жеріне патша үстемдігін жүргізу ісі күннен-күнге қиынға түсе бастағанына көзі жеткеннен кейін, Орта жүз, Кіші жүз және Орынбор губернаторына бірдей жер орталығы деп саналатын Ор қаласындағы кеңеске Әбілмамбет хан мен Абылай сұлтанды және Әбілқайыр ханды шақырған-ды. Әбілқайыр баласы Нұралы екеуінің арасы салқындап бара жатқанын бұрыннан да сезетін. Бірақ Арал маңындағы елді Россия патшалығы Нұралыға беріп, хан санап, указ шығарғанына, бұл жұрт өз қарамағында екеніне тәубе етіп, баласымен бәлендей ашық сөзге бармайтын Әбілқайырдың ұққаны – Нұралының орыс патшасы жағында екені.